Hi und griaß enk!
I bin da Johannes Astner und bin 15 Joa oit. I kimm aus Werfenweng und bi beim Maschinenring im erstn Lehrjoa ois Goatn- und Grünflächengestoita. Noch da Voiksschui und Hauptschui bin i in die Fochschui Tamsweg gonga, owa durt hots ma nid so taugt. Donn hob i mi ois Lehrling beim Ring beworbn und hiaz bin i bei da Partie vom Robert Gloner dabei und hüf eam auf seine Baustön. Da Robert is Gärtnermoasta und kennt sie voi guat aus. Von dem konn i gewoitig vü lerna. Er is praktisch mei Lehrherr, so sogt ma do dazua. Mia hom a total obwechslungsreiche Oaweit, fost jedn Tog samma woanders und mia gfoits voi. I deaf mithöfn beim Heckn setzn, wenn ma an Weg oda an Zaun baun, Bam und Sträucha pflonzn ma a. Zletzt hom ma a Terrassn valegt, des woa voi zach. Donn tua i no Beete jäten, Schnittguat aufn Ohänga auflegn, am Ende donn die Baustö no sauba mochn und wos hoit sist no so onfoit. I bin beim Ring supa aufgnumma woan und a Gaudi homma a oft.
Aufsteh muas i scho fria, wei um sibmi geht´s los, do treff ma ins bei da Firma und foan donn zur Kundschoft aussi. Oba dafia vadean i scho mei eigens Göd, des is scho klass. Des oaweitn an da frischn Luft taugt ma a und i konn vü von dem wos i lean a dahoam guat brauchn. Wei spada mecht i scho amoi Baua wean. Beim Ring taugt ma a, dass ma so guat aufgnumma wird, a vo de Erwochsenen.
Heia hob i beim Wuzzelturnier mitspün deafn, des woa da Homma. Do hob i mitn Tom, insan Disponentn ausn Büro in St. Johann spün deafn und glott samma Zweita woan.
Mei Tipp: Wenn oana vo eich a den Beruf lerna wü, beim Ring nemmans no Lealing auf, von Pinzgau übern Pongau bis zum Tennengau hob i hoit gheat. Konn a Diandl a sei, eh kloa.
